Author: Yehia Kamal

في البداية كدة بس اوعى تتضايق اني بكتب بالعربي و ملك بالانجليش الفكرة ان واحد جايب في امتحان انجليش ثانوية عامة ٣٠ من ٥٠ لو كتب انجليش ممكن يعديكوا فأنا بعمل كدة عشان المصلحة العامة نبداء بقا
انا مش ضد feminism اه ونبي بس كدة عشان رابطة محبي روضة الشربيني و كلبوبات ال feminism ميعضونيش و حتى بعد الكلمتين دول انا عارف ان الناس تتضايق و الصراحة بقا انا بحب اضايق الناس فأيوة انا بتريق على اى حاجة و كل ، فأنا جاي اتخانق مع ملك ممثلة ال feminism النهاردة
بصوا انتو دلوقتي قريتوا تعريف ملك لل feminism فانا هقولكوا يعني ايه feminism من وجهة نظري . لو انت في مصر feminism يعني ان الرجالة كلهم ظالمين و ان الستات كلهم ابرياء و مش هقولكوا عن التفكير المتخلف بتاع بلوق بلوق بلوق !!!!!
إنما في العالم كله لو حبينا نعرف feminism هتلاقي بيتقالك بمنتهى البساطة EQUALITY و لكن لا احنا هنا في مصر تلاقيها بتقولك الراجل زي الست و لو مقمتش من الكرسي بتاعك في الاتوبيس بمبدأ ان مفيش فرق هتلاقيها منزلة بوست طويل عريييييض على الفيسبوك و تكتب في آخرة ( الرجالة ماتو في الحرب) !!!!!! انتي عايزة من اهلي ايه يا ست انتي !!!
احنا اتفقنا من شوية ان ال feminism هي المساواة في الحقوق و الواجبات بين الرجل و الست بس هو في البداية ليه ال feminism ظهرت أساسا؟؟؟ في الحقيقة و عشان اكون حقاني قبل ١٩٢٠ الدنيا كانت صعبة اوي على الستات بداية من
الاستعمار الي كان بيبوح جسدهم و شرفهم و من الرجالة الي كانوا بيتعاملوا معاهم على انهم درجة تانية ….. اهو انا حقاني قلت الي كان بيحصل فيكوا ، في ١٩٢٠ ظهرت في السنة ديه في مصر حركات و جمعيات بقيادة صفية زغلول ضد الاحتلال و تطالب بحقوق الشعب كله و حقوق السيدات على وجه خاص اينعم كان تقريبا شعار المظاهرات ديه ” كخ يا الاستعمار “بس ميمنعش ان الفكرة نفسها نبيلة (لا مش نبيلة عبيد يا خفيف الظل) . زي مقلتلكوا ان اه الستات كانوا بيعانوا و لحد دلوقتي في حوادث ضدهم بس ده اكيد مش معناه يا بلد بقر ان الرجالة كلهم ولاد ستين في سبعين ، ولا معناه انكوا بتمشوا في الشارع بيترموا عليكوا طوب، الحقيقة بقا ان الرجالة بتعاني من هوس المرأة بأنها طخنت او ان في حد احلى منكوا !!! يعني المفروض يبقى مثلا على نفس الترابيزة scarlet johanson و وتسأل مين احلى انا و لا هي!!!! يعني انا هكدب عليكي بس لو سمحتي يعني شنبك اطول من شنبي ديه مش عادي . اتحدى بقا أي بنت عمها تقولي ان البنات نيتهم صافية من ناحية بعض حتى!!!! دي حاجة اضمنهالك في الرجالة ان الشلة الي قاعدة على القهوة ديه لو غارو من بعض هيبقى بسبب بولة الاستميشن الي خسروها مش اكتر.
و زي كل شئ ال feminism ليها فوايد و اضرار و مفيش غير مجتمع متخلف هو الي يرفض المساواة بين الرجل و الست ، انا عمري مكانت مشكلتي مع ال feminism لكن مع طريقة تفكير البقر عابدي رضوى الشربيني و في الحقيقة بقا انا تعبت من كتر البقر في بلدنا .!! و عازين الحق ال feminism ايوة بتخلي المجتمعات تتقدم بس الفكرة في طريقة تفكير الناس هل هما فعلا عاوزين المساواة في الحقوق و الواجبات ام يريدون الحقوق بس؟؟؟؟؟
احنا مجتمعنا الحمد لله مجتمعنا مقسوم لأربع فرق كل فريق عنده طريقة للتفكير !!! الفريق الأول: ابو جهل و شلتة
دول شايفين ان الست مكانها المطبخ و ملهاش حقوق و تبقى تابعة لجوزها او اهلها و ملهاش رأي و ان الست وظيفتها الأمومة فقد لا غير و طبعا نص كلامهم هيبقى بيقولك الدين و التقاليد بيقولو و عيب ، و حتى لو الدين بيقول كدة معلش يعني انا ليا عقلي الي يحكم على الأمور. الغريب انك تلاقي في بنات بيساندوا الفريق ده و هما معروفين بكلبوبات التيك توك ( ايوة في اكتر من نوع للكلبوات ) .
الفريق التاني : بلوق بلوق بلوق
دول كلهم بنات و كلهم لسة متخازوقين و طبعا عندهم فراغ عاطفي و بيكرهوا الرجالة و شايفين نفسهم مضروبين بالجزمة دايما و مظلومين من ساعة متولدوا .
الفريق التالت : سومة العاشق دول كلهم رجالة و دايما بيطبلوا و بيعملوا شير لبوستات شاعر المهلبية عمرو حسن و طبعا احنا عارفين ليه هما بيعملوا كده . هما
معرفوش يعني ايه feminism الا أول امبارح أساسا و شافوا ان الموضوع فيه بنات كتير فقرروا يكونوا هناك. الفريق الاخير : الناس الي بتفهم
هما الناس الي بجد بيفهموا و عارفين ان الرجالة منهم الوحش و الحلو زي كل حاجة في حياتنا و الستات منهم الحلو و منهم الوحش و مشكلتهم الوحيدة انهم قليلين اوي في بلدنا .
كلمتين جد بقت في الاخر عشان الناس متفهمش غلط كلامي، انتي من حقك تعملي أي حاجة من حقك تتجوزي الي انت عايزاه ، تلبسي ، تتكلمي ، تعملي كل حاجة و حقك ميتلعبش بيكي كل حاجة حقك بس خليكي فكرة الحقوق بيجي معاها واجبات هيا حاجة
واحدة لازم يبقوا مع بعض ، آخر حاجة لازم كلنا تفتكر اسراء ضحية الجهل و التخلف و العادات و التقاليد المتخلفة. رحمها الله و اسكنها فسيح جناتة